Abschrift der Stiftungsurkunde vom 2. Mai 1398 

(Hist. Archiv KölnHaupturkundenarchiv U2/6203)

 

Ritter Heinrich von Hückelhoven, Erbschultheiß von Eschweiler, und seine Frau Margareta (Bove von der Heyden /Bovenberg) stiften mit Zustimmung des Steinfelder Abtes Gerhard von Wichterich und des Arnold von Nechtersheim, Pfarrer von Fritzdorf, eine Kapelle in Arzdorf. Als Zeugen siegeln zusätzlich Johann von Kempenich (Schwiegersohn) und Heynrich Rollman von Dadenberg (Schwager). Die 25 Marck Unterhalt werden aus Ihren Besitzümern in Arzdorf und Fritzdof geleistet. In der Urkunde wird auch auf ein Besitztum "Hinter der Capelle" verwiesen, ist dies ein Hinweis darauf, dass es nicht die erste Kapelle in Arzdorf ist? Die Flurbezeichnung "Hinter der Kapelle" gibt es heute noch und soll sich dieser Flurname bereits vor dem Bau der Kapelle geformt haben?  

 

Wir Heynrich van Huchelhouen ritter ind erfschoiltisse zo Eschwylre und Margareta syne eliche huysfrauwe dun kunt allen luden ind bekennen offenbairlichen vur unss ind unse erven, dat wir durch sunderliche andachtliche mynne ind leiffde, die wir schuldenclichen haven goide unsem lieven hirren zo loyve ind eren, unseren selen zo heile, troiste  ind genaiden, ind vort zo gehüchnisse ind gedeychtnisse unsere alderen selen, die van ertrich gevairen synt, dat yn got unse hirre geneidlich wille syn , myt naymen herren Reynartz pastor wilne zo Adendorp unss oymen, herren Wilheims genant Bonüen ritters ind vrouwen Druden synre elicher huysfrouwen, swegerhirre ind swegerfrouwemyns Heynrichs van Hüchelhoven vurscheven, so dat haven wir gesamender hand ind eyndreichtlichen myt guden willen ind vurraide gesteidicheit ind dotiert,ordynyert ind begaefft eyne capelle geleigen zo Artzstorp, ind wir haven dieselve capelle doen wien in ere unser liever vrouwen, in ere sente Staentzlaus ,sente Anthonys ind sente Servais, ind dat ouch mit willen ind gehenckenisse der erberre hirren heren Gerartz van Wichterich, abd des goitzhüyss zo Steynfelt,ind heren Arnoiltz van Neichterssheim, pastoir zo Vryetzstorp zorzyt, in des kyrspel dese vurgenante capelle geleigen is, behalden doch eyme abd van Steynveld ind dem pastoire alleweige yrs reichten daynne, as dat ouch by underscheide herna geschreven voilght. Also haven wir Heynrich und Margareta elude vurschreven vur unss, unse erven ind nakomelinege püyrlichen gegeven ind wir geven overmytz desen brieff zu der capellen vurschreven eyne erffliche iairliche rente ind gulde myt naymen vunffindtzwentzich marck pennynege Coelsch pagaments, die wir sy, as die pastoire synt off hernamails werden mogen, bewyst haven zo der capellen vurschreven, as herna geschreven voilght, dat zo verstain sy, dat wir vur vunff marck des vurgenanten erfflichen pennynegeltz gegeven haven zo der capellen vurschreven unse vrye hoifstad in dem dorpe zo Vryetzdorp vor Snytz hove geleigen, wie die myt boymen, wyden, alle yrme zogebur geleigenis an eynander vür dry marck erfflichs pennynegeltz geacht ind also gud geprofft, ind ouch anderhalven seister weys, dye Reynartz erven van Vryetzsdorp geldent erfflichen iairs, van eyme stucke wesn ind lantz, geacht ind geproift ass gud as eyne marck erflichs pennynegeltz, und vort dan eyne marck erfflichs pennynegeltz die iairs Jacob Bolen Lucien sun gilt van dry morgen lantz zu Vryetzstorp geleigen. Ind vort dan die ander tzwentzich marck, des egenanten erfflichen pennynegeltz, die hayn wir vur unss, unse erven ind nakomelinege bewyst ind bewysen oevermytz desen brieff up unse erffliche gulde ind rente herna geschreven, die wir darvour erflichen eyme pastoir zo der capellen vurschreven verbunden ind zo underpand gesad haven ind setzen mytz oever desn brieff, myt naymen eicht seyster weyss erflicher gulden, der Johann zo der Lynden vier seister gilt van eyme morgen artlantz up dem hoiltzweige ind van vyerdemhalven vierdel lantz an der ryncken geleyghen, und die ander vier seyster, die gilt uns iairs Heynrich Voyss van vierdemhalven vierdel lanz up dem hoiltzweige ind schiessent up den Adendorper pat, ind vunff vyerdel lantz up der cümben schiessent up Adenaüwers küle, ind dan ouch eyn vierdel geleigen hinder der capellen, und dye hoistad up dem wyer: ind vortme seystzeeyn seister ind eyn moilenvass weys, dye Gobel Voyss unss iairs gilt van dryn morgen lantz gheent up den hoiltzwech lanx die kümbe, van zween morgen artlantz boven dem hoiltzweige neist Snytz lande, un vunff vierdelen lantz up der kümben schiessent up dat dorp, van eyme halven morgen lantz by Peter Schoilassen an dem moilenweige, eyme halven morgen geyt ouch up den hoiltzwech by Johanne Tielen sone, dan dru vierdel up dem Adendorper paide; ind ouch vort seys seister weys, die Gudruyd dye Peysen gilt iairs van dryn morgen lantz, der zween morgen geleigen sint by dem dorpe up der kümben ind schiessent up den Vylpher pad, dru vierdel up dem hoiltzweige an gheen syte dem pütze, und van eyme vierdel ouch up der kumben gheit up den hoiltzwech; vür wilche vurgenante vunff marck sal nü vort alleweige eyn pastoir zu Vryetzstorp van weigen der capellen vurschreven haven dat egenante erve, dat wir eine darvur gegeven haven ind darvur geven, ass vurschreven steit, und die ander tzwentzich marck solen wir Heynrich ind Margareta vurschreven, unse erven ind nakomelinege eme vort alle iair eycht daige vur sente Remeys daige handreichen ind betzalen van der erffgulden ind unser renten vurschreven, die wir darvur zo underpande gesad ind verbunden haven, wie ouch vurschreven steit, zo der capellen vurschreven erfflichen ind umberme in memorie ind gedeichtnisse unser ind der selen unser alderen vurgenannt. Ind darumb so hai der vurgenante her Arnoilt pastoir nü zurzyt zo Vryetzstorp myt raide, willen ind gehenckenisse syns oeversten des abdz van Steynvelt vurgenannt vur sich ind syne, dat sy zu verstain as vur dye, wilcher eyn pastoir der kyrchen zu Vryetzstorp is, geloifft alle welchen eyne mysse zo doen ind zu halden umber in yeclicher wechen eine mysse up den dynstagh, und off dye mysse doch neyt up den dynstagh gehalden en wurde, so sal doch der pastoir van Vryetzstorp off eyn ander bescheiden priester van synen weigen die mysse up ander der daige eynen in der wechen halden in der capellen vurschreven, so dat umber in yeclicher wechen eyne mysse gehalden ind gedain werde zo ewichen daigen. Und wye manche mysse in der capellen vurschreven versümpt ind neit gehalden enwurde, so sal umber vur yecliche versümpde mysse an der renten vurschreven dem pastoir affgayn seyss schillinge pagamentz vurschreven, ind solen wir off unse erven behalden ind keren, war wir willen; des ouch ich Arnoilt van Neichtersheim, pastoir zu Vryetzdorp vurschreven, bekennen ind ergien, dat ich angesien ind bedacht haven die vurgenante gaüe, mylde werck ind genaiden der elude vurschreven, ind han mich darumb mytz willen ind wyst myns oeversten des abdz vurschreven vur mich ind myne nakomelinege, die pastore sint off werden mogen der kyrchen van Vryetztorp vurschreven, eyndreichtlchen verdraigen myt den eluden heren Heynriche ind vrouwen Margareten vurgenannt ind hain mich verbunden darumb dey vurgenanten erffmysse in der capellen vurschreven alle wechen eyns zo doen ind zo halden, wie vurschreven steit oevermytz mich selver off eynen anderen bescheidene priester. Und wie elude Heynich ind Margareta vurschreven bekenn oüch , dat zo dyser zyt zo der capellen verschruvenen gheyn erve noch rente me engehoirt, dan dye rente ind gulde vurschreven, die wir darzo gegeven han mit underscheide, as vur ind na in dessen brieffe geschreven steit. Ind so wat renten ind gulden anders me zur zyt nü hait zo Vryetzstorp ind zo Artzstorp, dye hait van alders zo synre kirchen gehoirt ind vort zur kirchen blyven ind gehoiren sal. Ind vortme so wat umberme in der capellen vurschreven geoffert wirt, wilcherleye de offer sy, dat sal der vurgenante pastoir haven ind behalden vur sich ind neyman anders. Und in alle desen sachen, donacien ind gyfften, so is gevurwert, dat wir Heynrich ind Margareta vurschreven haven unss ind unsen erven daynne behalden, dat wir mogen, wilche zyt ind wanne wir willen, hernamails die vurgenante weysgulde, dye wir yn zo underpande gesad haven vur die zwentzich marck pennynegeltz, ass vurschreven steit, wederumb an uns gelden ind loysen mogen, sa dat wir eynen pastoir die zwentzich marck vurschreven erflicher gulden geüen ind bewysen up ander erve ind gud, da wir dat haven off gegelden künnen, da dat gelich wass mal in das sicher bewyse syain argelist der capellen vurschreven. Und wir morgen der renten eyn deil wie vil wir kunnen off willen off wie wenich vur off na gelden ind bewysen zo der capellen vurschreven dem pastore die vürgenante weysgulde also weder an uns zo loesen ind zo vryen van dem verbuntenisse vurschreven, ind dat oevermytz besegelde bryeve durch desen brieff zo stechen dat doch desen brieff neit ergeren noch vicieren ensal. Ind is oüch gevurwert, so wat iairs dem pastore der capellen vurschreven in letzalinegen der zwentzich marck erfrenten vurschreven gebreiche, des sal hey ind mach sich erkoüeren an den weysgulden vurschreven, die darvur zo underpande gesad is, ass vürschreven steit, nareychte ind gewoynden des lantz ind gerychtz myt unss, alle argeliste hiean ussgescheiden. Ind dys zo urkunde ind getzuge gantzer steidicheide so hain ich Heynrich van Hychelhoven, ritter und erfschoiltisse zo Eschwylre vurschreven, vür mich ind Margareten myne eliche vrouwe myn ingesegel an desen brieff gehanegen, des ich Margareta vurschreven bekennen ind gebruychen in desen sachen ind ich hain ouch dan myn ingesegel darzo an desen brieff gehaneghen. Ind zo myrre steitgheide so hain wir beide samen vort gebeiden Herren Johanne herre zo Kempenich ritter ind herren Heinriche Roylmann van Daidenberg ritter, unse eydüm ind swaiger dat sy ere ingesegele an desen brieff gehanegen havent, des wir Johan herre zo Kempenich ind Heynrich Roylman vurschreven bekennen zogetzuge in urkunde unser ingesegele.

Datum anno domini milesimo trecentesimo nonagesimo octavo, die scunda mensis maii.

 

Kontakt:

admin@antoniusverein-arzdorf.de